من يقول الزين - خالد الفيصل

من يقول الزين مايكمل حلاه

كل شي في حبيبي اكتمل

الله اللي كمله والله اللي عطاه

مابقى للزين في خلي محل

العيون أحلى من عيون المهاه

شافها قلبي وصفق واحتفل

نظرته من فتنته شعله حياة

والجفون من الحيا فيها كسل

ساهم رمشه على الخد سناه

كن لمعه وجنته ورد وطل

والشفايا كنها جمر الغضاة

تحرس الريق المحلى بالعسل

والشعر ليل نقل حمرة مساه

أجعد حول على صدره همل

مايج من فوق متنه ماطواه

لون شلال مع المغرب نزل

إنطلق جيده يماري في بهاه

فوق مياس تعزل واعتدل

بالرشاقه فيه من ظبي الفلاه

لي مشى كنه على الروح انتقل

ريحته من كل زهر منتقاه

والزياده للخزامى والنفل

صافي مثل المطر فوق الصفاه

باسم مثل البشاير بالأمل

جامع من كل زين منتهاه

مستحيل الوصف في خلي سهل

كايد ماهو يلين بغاه

يرتفع عن كل سقطات الزلل